Sunday, August 10, 2008
قعدة حلوة ودردشة
بيض وجبنه وفرفشة
واحدة جامدة مدندشة
حلم تايه فى نغم مقسوم ما بين عجز روح وكلبشة
ع القهوة جابوا سيرة الزحام
خبر اعتقال وميت مقال
ع القهوة شربوا للكيعان
دى مجزرة ... والواد جعان!
وفى قهوة تانية أُبهة
الواد ده شيك ومنجهة
فاضى فراغ البلالين
مستنى معنى من سنين...طب جوز عينين...سيجارتين...اى توهة مفرقعة
ع الكرسى قاعد للخبر
دولة يمين ومختبر
شاعر حزين حزن النضال
قوة حنين مهما استحال...مهما استحال ، كلمته مولعة
وجع سنان ، وجع قلوب مستوحدة
وجع دماغ من هم فكرة مجهدة
وجع بقاء للاقوى ...مع ان العظام متفتفتة
وجع فراق جوه حضن اللقاء متمسكة
يمين ...شمال...اتجاه غير؟ مش مهم
قوانين طين...معانى هبلة؟ مش مهم
مظلوم؟ مش مهم
محروم؟ مش مهم
حنقضيها حب وكلام يدغدغ القلب؟
ممكن ساعات ، ممكن سنين...ممكن بس!
نجيب جنين؟
نجيب لفين؟؟
مكلوم فى روحك ولا بوحك ولا يمكن ناسى
ان جروحك هى صوتك هى عقلك هى ألمى فى ناسى
زى الورق دايب فى حبر توه كلام احساسى
انا بفضفض ومش عاجبنى....اهم كلمتين وروحين ع الماشى
<<Home